ԱԺ նախագահ Աշոտ Ղուլյանն ընդունել է Քարիմ Վան Օվերմայերին
Արցախի Հանրապետության Ազգային ժողովի նախագահ Աշոտ Ղուլյանը հոկտեմբերի 12-ին ընդունել է Բելգիայի Ֆլանդրիայի տարածաշրջանի Աալստ քաղաքի քաղաքապետի առաջին տեղակալ Քարիմ Վան Օվերմայերին, որը Արցախ է ժամանել ընտանիքով՝ մասնակցելու «Համագործակցություն հանուն արդարության և խաղաղության» համաժողովին:
ԱՀ ԱԺ մամուլի ծառայության տեղեկացմամբ, խորհրդարանի ղեկավարը շնորհավորել է Քարիմ Վան Օվերմայերին նախօրեին Արցախի Հանրապետության նախագահի կողմից շնորհված «Երախտագիտություն» պետական պարգևի կապակցությամբ և նշել, որ այն ճիշտ գնահատական է՝ այս տարիներին նրա կատարած աշխատանքի համար:
Աշոտ Ղուլյանը նաև կարևորել է տարբեր երկրների, այդ թվում Ֆլանդրիայի բարեկամների հետ համագործակցության անհրաժեշտությունը մարդասիրական ուղղություններով: Խորհրդարանի ղեկավարը համոզմունք է հայտնել, որ ամեն ինչ արվելու է՝ Արցախի և Ֆլանդրիայի միջև հարաբերությունների զարգացումը նոր՝ ավելի բարձր մակարդակի հասցնելու համար և շնորհակալություն հայտնել ՀՅԴ Եվրոպայի Հայ Դատի հանձնախմբի նախագահ Գասպար Կարապետյանին ու գրասենյակի գործադիր տնօրեն Հեղինե Էվինյանին՝ Արցախի բարեկամների հետ համագործակցությանը նպաստելու համար:
Կարիմ Վան Օվերմայերը, շնորհակալություն հայտնելով ընդունելության համար, նշել է, որ Արցախի Հանրապետության նախագահի կողմից ստացած պարգևը նախևառաջ խթան է՝ Արցախին ուղղված իր հետագա գործունեության համար: Նա Ֆլանդրիայի և Արցախի հարաբերությունների սերտացման գործում կարևորել է Արցախի՝ ժողովրդավարական արժեքներին դավանելու հանգամանքը և նշել, որ աշխատելու է Ֆլանդրիայի խորհրդարանում Արցախի Հանրապետության բարեկամական խմբում նոր անդամներ ներգրավելու ուղղությամբ:
Քննարկվել են ապակենտրոն համագործակցությանն ու բարեկամական շրջանակի գործունեությանը վերաբերող հարցեր:
Հանդիպմանը մասնակցել են ԱԺ պատգամավոր, «Արցախի Հանրապետություն – Բելգիայի Թագավորության Ֆլանդրիայի խորհրդարան» բարեկամական խմբի նախագահ Արամ Գրիգորյանը և ՀՅԴ Եվրոպայի Հայ Դատի Հանձնախմբի գրասենյակի գործադիր տնօրեն Հեղինե Էվինյանը:
