Մենք պատերազմ չենք սկսելու, բայց ով էլ որ սկսի, վստահաբար ավարտողն ինքը չի լինելու․ Իրանի ԱԳՆ
Սեպտեմբերի 24-ին հետո համաշխարհային հանրության համար պարզ դարձավ, որ աշխարհի տարբեր երկրներում սիոնիստական լոբբիների ճնշման տակ ԱՄՆ-ին և Իսրայելին առայժմ հաջողվում է կազմավորել «նոր հակաիրանական ճակատ»: Այս եզրակացությանն ինքնին հանգում ենք, երբ պարզում ենք, որ Մեծ Բրիտանիան, Ֆրանսիան և Գերմանիան, այնուամենայնիվ, տեղի տալով ճնշումներին՝ «հանձնվեցին»՝ սատարելով ԱՄՆ-ի՝ Պարսից ծոցում հնարավոր ռազմական գործողություն իրականացնելու պլաններին։ Նրանք նաև անհիմն մեղադրեցին Իրանին՝ Սաուդյան Արաբիայի նավթային օբյեկտների վրա հարձակման մեջ: Այս երեք եվրոպական երկրների կոչը Իրանին («նոր բանակցությունների գնալ համաշխարհային տերությունների հետ՝ իր միջուկային և հրթիռային ծրագրերի և տարածաշրջանային անվտանգության հարցերով»)՝ Թեհրանում ծիծաղ ու վրդովմունք առաջացրեց: ԱՄՆ պետքարտուղար Մայք Պոմպեոն շնորհակալություն է հայտնել եվրոպական դաշնակիցներին՝ ընդհանուր դիրքորոշման համար: Ըստ պետքարտուղարի՝ «դա կամրապնդի ԱՄՆ դիվանագիտությունն աշխարհում»: Կարծում եմ, որ ԱՄՆ-ի, Բրիտանիայի, Ֆրանսիայի և Գերմանիայի նման ենթակա պահվածքը (Իսրայելի նկատմամբ) կարող է միայն մեծացնել համաշխարհային պատերազմի ռիսկը: Ոչ պակաս հետաքրքիր նրբերանգ. եվրոպացիները որոշեցին հանդես գալ Իրանի դեմ հենց այն բանից հետո, երբ Թեհրանն ազատ արձակեց նախկինում ձերբակալված բրիտանական լցանավերից առաջինը…
Բայց նախ՝ Իրանի արձագանքը եվրոպական երկրների հերթական սրիկայությանը: Իրանի արտգործնախարար Մոհամադ Ջավադ Զարիֆը հայտարարել է, որ նախքան որոշակի պայմաններ սահմանելը, Թեհրանի եվրոպական գործընկերները պետք է կատարեն ՀՀԳԾ-ի (Իրանի հետ «միջուկային գործարքը» 2015 թվականի հուլիսից) ներքո ստանձնած իրենց պարտավորությունները։ Նա շեշտել է, որ Իրանը բացառում է համաշխարհային տերությունների հետ նոր համաձայնագրի շուրջ բանակցությունների հնարավորությունը: Իսկ CBS News հեռուստաալիքի «Face the Nation» -ին տված հարցազրույցում Զարիֆը հայտարարել է. «Ոչ, ես վստահ չեմ, որ մենք կարող ենք խուսափել պատերազմից: Վստահ եմ, որ մենք պատերազմ չենք սկսելու, բայց ով էլ որ կսկսի, վստահաբար ավարտողն ինքը չի լինելու»: Նա հավելել է, որ Իրանը պատրաստ է միջազգային մի խումբ քննիչների թույլատրել հետաքննել հարձակումները և պարզել մեղավորներին՝ միաժամանակ հավելելով, որ դրանք պետք է «անաչառ» լինեն: «Թող դա անեն, քանի որ Իրանին մեղադրելու համար նրանք պետք է հրաշք կատարեն»,- ասաց Զարիֆը: Այնուհետև Իրանի ԱԳՆ-ը Բրիտանիայի վարչապետին առաջարկեց Թեհրանին մեղադրելու փոխարեն, դադարեցնել Սաուդյան Արաբիային զենքի մատակարարումը: Իրանի նախագահ Հասան Ռոհանին դատապարտել է եվրոպացիների անհիմն մեղադրանքները՝ սաուդյան «Aramco» ընկերության վրա հարձակումների վերաբերյալ, և ևս մեկ անգամ հաստատել է, որ Նյու Յորքում ՄԱԿ-ի Գլխավոր ասամբլեայի շրջանակներում ԱՄՆ նախագահ Դոնալդ Թրամփի հետ առանձին բանակցություններ չեն լինի:
Արտահայտվել է նաև Ռուսաստանը: Ռուսաստանի արտաքին հետախուզության ծառայության (ԱՀԾ) տնօրեն Սերգեյ Նարիշկինը հայտարարել է, որ Սաուդյան Արաբիայում «Aramco»-ի նավթային օբյեկտների վրա հարձակումների չհիմնավորված մեղադրանքներն անընդունելի են, և Մոսկվան խստորեն դատապարտում է Իրանի դեմ անհիմն մեղադրանքները: Նարիշկինը նաև ավելացրել է, որ «այդ գործողությունների հեղինակը կարող են լինել տարբեր պետություններ, շարժում կամ ինչ-որ այլ ուժ»: Չինաստանը նույնպես աջակցել է Իրանին և դատապարտել Արևմուտքի անհիմն մեղադրանքները Թեհրանի դեմ: Մի խոսքով, համաշխարհային քաղաքականության հերթական «բևեռներն» ավելի պարզեցին:
Սերգեյ Շաքարյանց
