«Ռուսական երկաթուղիները» պատրաստվում է խզել ՀՀ իշխանությունների հետ համաձայնագիրը. RTVI
«Ռուսական երկաթուղիներ» պետական ընկերությունը պատրաստվում է խզել Հայաստանի իշխանությունների հետ համաձայնագիրը՝ հավաստիացնելով, որ նրանք արգելափակում են իր դուստր ընկերության՝ «Հարավկովկասյան երկաթուղիների» աշխատանքը, որը ղեկավարում է հայկական երկաթուղիները: Tert.am-ի տեղեկացմամբ, այդ մասին RTVI-ին ասել է աղբյուրը, որը ծանոթ է Ռուսաստանի և Հայաստանի միջև բանակցությունների ընթացքին:
Նշվում է, որ տեղեկությունը հաստատել են ՌԴ տրանսպորտի նախարարությունում:
«Ռուսական երկաթուղիների» հարաբերությունները ՀՀ իշխանությունների հետ սրվել են խուզարկումների ու քրեական գործերի պատճառով, որոնք Երևանը հարուցել է «Հարավկովկասյան երկաթուղիների» դեմ:
2018 թվականի օգոստոսին ընկերության գրասենյակում խուզարկումներ են անցկացվել 19 000 դոլարի չափով հարկեր չվճարելու կասկածանքով: Ընկերությունում նշել են, որ ուժայիններն առգրավել են իրենց փաստաթղթերը:
Դեկտեմբերին ՀՀ քննչական կոմիտեից հայտնել էին, որ հետաքննում են «Հարավկովկասյան երկաթուղիների»՝ վերջին 10 տարվա գործունեությունը:
RTVI-ի աղբյուրների համաձայն՝ ընդհանուր առմամբ ընկերության դեմ հարուցվել է 7 գործ: Ընկերությունը փորձել է իր փաստաթղթերը վերադարձնել դատարանի միջոցով, սակայն նրան մերժել են:
Ընկերությունում ֆինանսական մեղադրանքներն անհիմն են համարում:
RTVI-ի աղբյուրի համաձայն, եթե Հայաստանը չցանկանար ճնշում գործադրել Ռուսաստանի վրա, այլ պարզապես ցանկանար պարզել իրավիճակը, նա կդիմեր միջազգային դատարան: «Փոխարենը հայկական կողմը նախընտրեց ճնշում գործադրել քրեական գործերով»,- նշում է աղբյուրը: