Աղոթում ենք, որ Ամենազորն Աստված Իր օրհնության ու առատ շնորհների մեջ առաջնորդի բոլոր հայորդիների կյանքը. Գարեգին Բ

Ամենայն Հայոց Կաթողիկոս Գարեգին Երկրորդը շնորհակալություն է հայտնել իր տարեդարձի կապակցությամբ ստացած շնորհավորանքների համար:

«Սիրելի բարեպաշտ ժողովուրդ,

Բերում ենք ամենքիդ Հայրապետական Մեր սերն ու օրհնությունը ծննդյան Մեր տարեդարձի առիթով հղված բազում շնորհավորանքների ու ջերմ բարեմաղթանքների համար:

Աղոթում ենք, որ Ամենազորն Աստված Իր օրհնության ու առատ շնորհների մեջ առաջնորդի բոլոր հայորդիների կյանքը` պայծառացնելով այն բազում հոգեշահ և ազգօգուտ իրագործումներով:

Հայցում ենք նաև, որ Տերը Իր Սուրբ Աջով պահապան լինի և անվրդով խաղաղություն ու բարի առաջընթաց պարգևի հայրենի մեր երկրին և աշխարհասփյուռ մեր ժողովրդին»,- նշված է ուղերձում: