«Ամառային զորակոչն ընթանում է պատշաճ մակարդակով». Վահե Էնֆիաջյան
ՀՀ ԱԺ նախագահի տեղակալ Վահե Էնֆիաջյանը հուլիսի 12-ին այցելել է ՀՀ պաշտպանության նախարարության Երևանի թիվ 2 զինվորական կոմիսարիատ: ՀՀ ԱԺ լրատվական ծառայության տեղեկացմամբ, այցի նպատակը ամառային զորակոչի ընթացքին տեղում ծանոթանալն էր:
Զինկոմիսարիատի պատասխանատուն տեղեկացրել է, որ ամեն ինչ կազմակերպվել է օրենքի տառին համապատասխան, պատշաճ մակարդակով: Գործող զորակոչային հանձնաժողովի սպաները զրուցել են բոլոր զորակոչիկների հետ, տեղեկացրել նրանց իրավունքներին, ինչպես նաև հուզող հարցերով հրամանատարներին դիմելու կարգի վերաբերյալ:
Տղաներն անցել են բժշկական բոլոր կաբինետներով: Նրանք առողջ են և պատրաստ իրենց պարտքը կատարել հայրենիքի առջև: Վահե Էնֆիաջյանը կարևորել է այն հանգամանքը, որ բացակայող զինակոչիկ չկար:
«Յուրաքանչյուր հայորդի պետք է ծառայի Հայոց բանակում: Զորակոչիկները մեկնում են մեծ պատասխանատվությամբ հայրենիքը պաշտպանելու»,- ասել է ԱԺ նախագահի տեղակալը՝ հավելելով, որ զորակոչային ողջ շրջափուլը՝ զորակոչ-բանակ-դիրքեր, լինելու է իր ուշադրության կենտրոնում: Վահե Էնֆիաջյանի հավաստմամբ՝ զորակոչիկների հետ շփումները, զինկոմիսարիատներ ու զորամասեր այցերը լինելու են շարունակական:
Նա մտերմիկ զրույցի է բռնվել զորակոչվող տղաների և նրանց ծնողների հետ, մաղթել անփորձանք ու բարի ծառայություն:
