Վթարի է ենթարկվել ՌԴ ՊՆ-ի գիտահետազոտական սուզանավը. 14 նավաստի զոհվել է
Ռուսաստանի Դաշնություն տարածքային ջրերում վթարի է ենթարկվել ՌԴ պաշտպանության նախարարության ենթակայության տակ գտնվող գիտահետազոտական սուզանավը, զոհվել է 14 նավաստի: «ՌԻԱ Նովոստիի» տեղեկացմամբ, այս մասին հայտնել են Ռուսաստանի պաշտպանության նախարարությունից:
Նախարարությունը հաղորդել է, որ նավաստիները խեղդվել են բռնկված հրդեհի ծխից: Նշվում է, որ հրդեհը մարվել է, սուզանավը փոխադրվել է Սևերոմորսկի ռազմական նավահանգիստ:
Հետաքննություն է կատարվում՝ ողբերգական վթարի հանգամանքները պարզելու համար: Առայժմ հրդեհի պատճառների մասին տեղեկություններ չեն հաղորդվել, հայտնի չէ նաև, թե քանի մարդ է եղել սուզանավում։
Հետաքննությունը վարում է Ռուսաստանի ռազմական նավատորմի գլխավոր հրամանատար, ծովակալ Նիկոլայ Եվմենովը, որն այս տարվա մայիսի 3-ին նախագահ Վլադիմիր Պուտինի հրամանագրով նշանակվել էր այդ պաշտոնում: