Մահացել է Կարինե Աշուղյանը

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանի ֆեյսբուքյան էջից տեղեկացանք, որ մահացել է Կարինե Աշուղյանը։

«Տաղանդավոր, բարի, ջերմ ու քնքուշ Կարինեն։ Երրորդ անգամ ես փակեցի իմ սիրելի մարդկանց աչքերը։ Հայրիկինս, Սամվելինս ու հիմա Կարինեի աչքերը։ Ցավը անտանելի է»,-գրում է պատգամավորը։

LIVEnews.am-ի խմբագրակազմը խորապես ցավակցում է Կարինեի հարազատներին և ընկերներին՝ ծանր կորստի առիթով։

Հայ բանաստեղծուհի, թարգմանչուհի, հրապարակախոս, փիլիսոփայական գիտությունների թեկնածու, Հայաստանի գրողների միության անդամ Կարինե Աշուղյանը ծնվել է 1962 թվականին, Արարատի մարզի Տափերական գյուղում։ Ավարտել է ԵՊՀ փիլիսոփայության և սոցիոլոգիայի ‎ֆակուլտետը, Հայաստանի Հանրապետության Գիտությունների Ազգային ակադեմիայի փիլիսոփայության և իրավունքի ասպիրանտուրան, աշխատել է նույն ինստիտուտում՝ որպես հայ փիլիսոփայության պատմության բաժնի կրտսեր գիտաշխատող:

Եղել է «Արարատ» մարզային թերթի խմբագիրը (1998-2008), աշխատել է ՀՀ ՊՆ «Զինվոր» պաշտոնաթերթում, ինչպես նաև տարբեր լրատվամիջոցներում՝ որպես լրագրող։ Գիտական և հրապարակախոսական բազմաթիվ հոդվածների հեղինակ է։

Խմբագրել է «Գրական տապան» միջազգային գրական փառատոնի ամենամյա մի քանի ժողովածուներ, տարբեր հեղինակների գրքերի գեղարվեստական խմբագիրն է: Նրա ստեղծագործությունները թարգմանվել են տարբեր լեզուներով՝ ռուսերեն, պարսկերեն, հոլանդերեն, լեհերեն, անգլերեն, թուրքերեն։

«Հմայիլներ» բանաստեղծությունների ժողովածուի համար արժանացել է ՀԳՄ Պարույր Սևակի մրցանակի: Պարգևատրվել է ՀՀ մշակույթի նախարարության Գրիգոր Նարեկացի հուշամեդալով, արժանացել է Պաշտպանության նախարարության և ՀԳՄ համատեղ ամենամյա մրցանակին։