Կայացավ ծնողների հանդիպումն իրենց զինծառայող որդիների հետ
Մայիսի 18-ին Պաշտպանության բանակում հայտարարվել էր բաց դռների օր, որի շրջանակում Երևանի քաղաքապետարանի նախաձեռնությամբ և բանակի հրամանատարության աջակցությամբ կազմակերպվեց արդեն ավանդական դարձած ծնողների հանդիպումն իրենց զինծառայող որդիների հետ:
ԱՀ ՊՆ լրատվական ծառայության տեղեկացմամբ, ծնողներին բանակի կենտրոնական ենթակայության զորամասերից մեկում ընդունեցին աղ ու հացով: Այնուհետև նրանք ծաղիկներ խոնարհեցին Վազգեն Սարգսյանի հիշատակը հավերժացնող հուշարձանին և ներկա գտնվեցին կազմակերպված հանդիսավոր միտինգին, որի ժամանակ հնչած բազում ելույթներում ևս մեկ անգամ արժևորվեց հայրենիքի պաշտպանի ծառայությունն ու բանակ-հասարակություն կապի ամրապնդումը:
Հանդիսավոր միտինգի ավարտից հետո, սահմանված կարգի համաձայն, ծնողներին հնարավորություն տրվեց օրն անցկացնել իրենց որդիների հետ:
