Բաց նամակ ՀՀ ոստիկանապետ Վալերի Օսիպյանին
Հարգելի պարոն Օսիպյան,
նոյեմբերի 6-ին խոսելով ՀՀ-ում նախատեսված ԼԳԲՏ ֆորումի մասին, նշեցիք․ «Այս պահին ինքս նպատակահարմար չեմ գտնում, որ անցկացվի Հայաստանում՝ նաև ռիսկերը հաշվի առնելով, անվտանգությունից ելնելով»: Մասնավորապես՝ նշել եք, որ «Մենք ինքներս էլ բացատրական աշխատանքներ տարանք, որպեսզի ՀՀ տարածքում տեղի չունենա այդ ֆորումը»:
Ինձ և հասարակության լայն շրջանակներին հետաքրքրող հարցերի շուրջ ակնկալում եմ Ձեր պարզաբանումները.
- Չեղարկվե՞լ, թե հետաձգվե՞լ է ԼԳԲՏ «քրիստոնյաների» 11-րդ ֆորումը։
- Արդյոք նոյեմբերի 15-18-ը կայանալիք ֆորումի չեղարկումը կապ ունի՞ դեկտեմբերի 9-ին կայանալիք ԱԺ արտահերթ ընտրությունների հետ։
- Ինչ վերաբերվում է Ձեր հայտարարությանը, որ Դուք անձամբ նպատակահարմար չեք գտնում ֆորումի անցկացումը ՀՀ-ում, կցանկանայինք պարզաբանեք նմանատիպ հայտարարությամբ հանդես գալը մտնո՞ւմ է Ձեր լիազորությունների մեջ, և ինչո՞ւ եք հայտարարում, որ ֆորումը չի կայանալու։ Ոստիկանության լիազորությունների մեջ մտնում է ֆորումի մասնակիցների անվտանգության ապահովումը։
Երրորդ հարցադրման վերաբերյալ հիմք է ընդունվել «Նոր Սերունդ» մարդասիրական հկ-ի հայտարարությունը, որում մասնավորապես նշված է․«Հաշվի առնելով համացանցում անընդհատ հնչեցվող սպառնալիքները, կազմակերպված հետապնդումները և ֆորումի վրա հավանական հարձակումների ռիսկերը, ինչպես նաև ոստիկանության կողմից պաշտպանելու լիարժեք պատրաստակամության բացակայությունը, «Նոր Սերունդ» Մարդասիրական հկ-ն, բանակցելով «Արևելյան Եվրոպայի և Կենտրոնական Ասիայի ԼԳԲՏ քրիստոնյաների ֆորումի կազմակերպչական թիմի հետ, հայտարարում է, որ որոշում է կայացվել չեղարկել 2018թ-ի նոյեմբերի 15-18-ը Հայաստանում կայանալիք հանդիպումը»։
Աղվան Պողոսյան
«Քաղաքացիական հարթակ» նախաձեռնության ղեկավար
